భజన చేయుచు భక్తపాలక

భజన చేయుచు భక్తపాలక
ప్రస్తుతింతు నీ నామమును
వృజినములపై జయము నిచ్చిన
విజయుడా నిను వేడుకొందు
||భజన||
దివ్య పదవిని విడిచి నీవు
దీనుడవై పుట్టినావు
భవ్యమైన బోధలెన్నో
బాగుగా ధర నేర్పినావు
||భజన||
నరుల గావను పరమునుండి
ధరకు నీవు వచ్చినావు
పరుడ నైన నా కొరకు నీ
ప్రాణము నర్పించినావు
||భజన||
చెడినవాడ నైన నన్ను
జేరదీసి ప్రోచినావు
పడిన నాడు గోతి నుండి
పైకి లేవనెత్తి నావు
||భజన||
ఎంత ప్రేమ ఎంత దయ
ఎంత కృప యేసయ్య నీకు
ఇంతయని వర్ణింప నిలలో
నెవనికిని సాధ్యంబు కాదు
||భజన||